Gibutyag ni Defense Secretary Gilberto “Gibo” Teodoro Jr. nga adunay basehan ang gobyerno sa pagduda nga pipila ka elected officials sa Pilipinas posibleng nakadawat og suporta gikan sa China aron magpakaylap og mga pahayag nga makapahuyang sa posisyon sa nasod sa West Philippine Sea.
Atol sa congressional budget briefing, giklaro ni Teodoro nga lisod pa makakuha og lig-on nga ebidensya kabahin sa maong alegasyon, ilabina kay wala’y access ang Department of National Defense sa bank deposits ug financial records.
Matod pa niya, mas angay nga financial authorities ang mosusi kung adunay money trail o pondo nga mahimong konektado sa Beijing.
Dugang pa, wala na siya miingon kung unsang klase sa suporta ang posibleng nadawat sa mga opisyal tungod kay dili niya gustong makaapekto kini sa posibleng ongoing law enforcement operations.
Hinuon, gibarugan ni Teodoro nga adunay pipila ka politiko nga klarong nag-echo sa talking points sa China, base sa ilang mga public statement.
Apan sa pagkakaron, wala gihinganlan ni Teodoro kung kinsa ang mga opisyal nga nakadawat og suporta gikan sa Beijing.
