DAVAO CITY – Human ang natalang recovery sa nahibilin nga confirmed COVID-19 patient sa Tagum City, nagpahimangno ang lokal nga panggamhanan nga dili pa angayan nga magmaya.
Bisan tuod nga makonsidera na nga COVID-free ang Tagum, nagpabilin pa gihapon ang “external threats”.
Gi-awhag sa city government ang publiko nga dili pa gihapon mokumpiyansa sanglit anaa pa sa unom ang suspected ug 47 probable COVID-19 cases sa lugar.
Gikanayong ang zero number sa kaso sa virus dili sumala pa basehan nga mamahimo na nga makalakaw ang mga tawo bisan asa.
Kinahanglan sumala pa nga mag-adjust ang mga tawo sa “new normal” hangtud nga madiskobrehan sa mga eksperto ang bakuna.
Kahinumduman nga sa milabay nga bulan, nakatala ang Tagum City ug siyam ka mga kumpirmado nga kaso sa ilang barangay.
Upat sa mga nahisgutan ang gikan sa Barangay Visayan Village, duruha sa Barangay Magugpo East, usa sa Barangay Madaum, ug usa sa Barangay Apokon.
Samtang kaniadtong Mayo 1, nakatala ang siyudad ug usa ka bag-ong nagpositibo sa Covid-19 sa Barangay Visayan Village hinungdan nga misaka sa 10 ang nagpositibo sa probinsiya Davao del Norte apan gilayon kini nga nakarekober.
