Gilauman sa Department of Energy nga hingpit nang matangtang ang system loss charge sa bayronon sa kuryente sa tuig 2027, ayha ang sunod nga State of the Nation Address ni Pangulong Ferdinand Marcos Jr. sa umaabot nga Hulyo 2027.
Sumala kang Energy Secretary Sharon Garin, dili sayon ang pagpatuman niini tungod kay bisan makahimo ang departamento og mga polisiya, posible nga malangan ang implementasyon niini sa pipila ka electric cooperatives.
Busa, sugdan dayon sa DOE ang pagtuki niini uban sa Energy Regulatory Commission (ERC) ug National Electrification Administration (NEA) aron mapaspasan ang proseso.
Base sa report, susihon sa mga ahensya ang kapin 100 ka electric cooperatives ug private distribution utilities aron matino ang mga kinahanglan nga pamuhunan sa pagpakunhod sa recoverable system losses nga karon gipapas-an sa mga konsyumer.
Kung mapatuman ang maong programa, gibanabana sa DOE nga mokunhod ang bayronon sa kuryente og lima hangtod napulo ka porsyento, depende sa distribution utility nga nagserbisyo sa matag lugar.
