Miuyon si kanhi Integrated Bar of the Philippines (IBP) National Executive Director Atty. Antonio Ligon sa paggamit ni Atty. Lorna Kapunan sa terminong “Superman” aron ihulagway ang giingong paagi sa paggamit ni Vice President Sara Duterte sa iyang confidential ug intelligence funds o CIF.
Gibutyag ni Ligon nga migawas sa impeachment trial ang mga rekord nga nagpakita sa pag-apod-apod sa dagkong kantidad sa kuwarta sulod sa usa ka adlaw apan sa nagkalain-laing lugar sa Pilipinas, base sa mga acknowledgement receipt nga gipakita sa House prosecution panel.
Matud usab niini, daw nagkinahanglan og “Superman” aron mahimo ang ingon nga pamaagi, ilabina kay pondo sa katawhan ang nalambigit.
Gipunting usab niya isip red flag ang paggamit sa mga alyas ug mga ngalan nga iyang giingong dili kasagarang madungog sa opisyal nga mga transaksiyon.
Dugang pa niini, giingon ni Ligon nga mahimong dawaton pa unta ang maong pamaagi kung kausa lamang nahitabo, apan giingong balik-balik kini nga gihimo sa mga opisina ni VP Sara, nga nagpakita og pattern sa sistema sulod sa taas nga panahon.
Gikwestyon usab ni Ligon ang paggamit sa acknowledgement receipt isip pamatuod sa paghatag sa intelligence funds, tungod kay kasagarang gigamit lamang kini sa ordinaryong mga transaksiyon sama sa mga baligya sa merkado ug dili sa opisyal nga transaksiyon sa mga ahensya sa gobyerno.
