Magpatuman ang Spain og mas hugot nga border controls sa tanang biyahe pinaagi sa eroplano ug barko gikan sa Italy, taliwala sa nagkagrabeng panaglalis sa duha ka nasud may kalabotan sa isyu sa illegal migration.
Sumala sa mga otoridad, misunod kini human temporaryong gisuspinde sa Italy ang Schengen Agreement, nga nagtugot sa gawasnong pagbiyahe tali sa daghang nasud sa Europe.
Dugang pa niini, gihangyo sa Spain ang Italy nga tangtangon ang ilang border checks sa dili pa moabot ang Domingo.
Apan, gisalikway kini sa Rome ug gipasiugda nga dili kini mopailalom sa bisan unsang “ultimatum” gikan sa Spain.
Matud pa, molungtad og usa ka bulan ang maong mga lakang gawas kon mausab ang sitwasyon.
Lakip sa ipatuman ang pagsusi sa pasaporte, nasyonalidad ug visa sa mga biyaherong gikan sa Italy, lakip ang mga Italyano ug ubang langyaw.
Kahinumduman, una nang nagpatuman ang Italy og susamang mga restriksyon human sa pagdagsa sa gibanabanang 78,000 ka ilegal nga migrante gikan sa Morocco paingon sa Spanish exclave nga Ceuta.
Hinuon, gipatin-aw sa Italy nga dili sakop sa dugang nga pagsusi sa utlanan ang mga Spanish citizen nga mosulod sa ilang nasud.
Sa kasamtangan, gipahibalo sa Rome nga magpadayon ang ilang border checks hangtod sa Agosto 15, tungod sa gilaumang bag-ong pagdagsa sa mga ilegal nga migrante ngadto sa Ceuta.
Matud pa sa Italy, gikinahanglan ang maong lakang aron mapugngan ang ilegal nga pagsulod sa mga migrante.
Apan, gisalikway sa Madrid ang maong pangatarungan ug giingong walay igo nga basihan ang posisyon sa Italy, tungod kay ang mga migrante nga mosulod sa Ceuta wala man kunoy direktang paagi aron makasulod sa Schengen Area.
