Gipadayag ni Senador Robin Padilla nga andam siyang makigpulong sa aktres nga si Angel Locsin, human sa ilang nagkalainlaing pahayag kabahin sa impeachment trial batok kang Vice President Sara Duterte. Sumala pa kang Padilla, abli ang iyang linya sa telepono alang kang Locsin kon gusto kini makig-estorya kaniya.
Giingon usab sa senador nga andam silang maminaw uban sa iyang asawa nga si Mariel Padilla. Dugang pa niini, misunod ang maong pahayag human sa mga gipatik ni Locsin sa social media diin iyang gi-awhag ang senador nga magbinayloay sila og political positions ug gipangutana ang giingong pagpabiling hilom niini sa panahon nga siya ang na-red-tag.
Matud pa sa aktres, wala mapamatud-i ang mga alegasyon batok kaniya ug nangutana kini nganong wala siya depensahi ni Padilla niadtong panahona. Kahinumduman, gipunting kaniadto si Angel Locsin sa mga komunistang grupo sa pipila ka kanhing opisyal sa militar ug ni kanhing National Task Force to End Local Communist Armed Conflict spokesperson Lorraine Badoy, tungod sa iyang humanitarian work ug mga adbokasiya atol sa administrasyon ni kanhing Pangulong Rodrigo Duterte.
