DAVAO CITY – Gikahimut-an karon ang nahimong dekorasyon sa usa ka bakanteng lote sa Brgy. Communal, Buhangin District ning syudad diin gi-display ang mga sam-ang nga nakabutang ang pangalan mga nagkadaiyang pangalan sa investment scam nga nanirado.
Kabahin kini sa paghinumdom sa nagsingabot nga adlaw sa mga patay o kalag-kalag.
Daghanan ang nalipay ug daghanan sab ang nakahinumdom sa ilang pait nga kasinatian human nga nangahimong biktima sa scam ug wala na nabawi ang kuwarta nga ilang gi-invest.
Kahinumduman nga nakabutang sa gimugnang mga sam-ang ang pangalan sa mga investment scam nga nanirado sama sa Joggle, Ever Arm, Titan, Almamico, Rigen, Dream Zion, Alamco ug daghanan pa.
Apan mas nakakuha ug atensiyon ang lungon nga gipahimutang sa tunga nga adunay nakabutang nga Rest in Peace KAPA.
Usa sumala pa kini sa mga pamaagi aron nga ipasibaw sa mga nahimong biktima sa scam ang ilang kadismaya ilabi na nga kadaghanan sa mga nahisgutan ang wala pa gihapon nakadawat sa ilang refund.
