Gi-atubang na karon ni Sarah Discaya ang legal nga aksyon human nga gisilbi kaniya sa National Bureau of Investigation (NBI) sa warrant of arrest nga may kalabutan sa P96.5-milyon nga “ghost” flood control project sa Davao Occidental.
Nasayran nga usa siya sa napulo (10) ka mga indibidwal nga gikasohan tungod sa giingong sayop ug iligal nga paggamit sa pondo sa gobyerno, nga nagpadayon pa karon sa imbestigasyon sa kontrobersyal nga proyekto.
Emosyonal usab ang reaksyon ni Discaya sa dihang gibasa sa mga operatiba sa NBI ang warrant of arrest batok kaniya may kalabutan sa maong flood control project.
Lakip sa mga kasong gipasaka batok kang Discaya mao ang graft ug malversation, nga non-bailable.
Human sa iyang pagdakop, gilayon nga gipailawom si Discaya sa medical assessment isip kabahin sa standard operating procedure alang sa mga nadakpan.
Sumala sa NBI, siguruhon una ang pisikal nga kahimtang ug kahimsog ni Discaya sa dili pa siya ipailawom sa booking ug detention procedures, subay sa nagkadaiyang patakaran sa kapulisan.
Human sa medical assessment, ipadayon ang mga legal nga proseso, lakip ang dokumentasyon ug pagdala kaniya sa hustong pasilidad samtang nagpaabot sa sunod nga lakang sa korte.
Kahinumduman nga una nang gipahibalo ni Pangulong Ferdinand Marcos Jr. nga gipagawas na ang warrant of arrest batok kang Sarah Discaya ug siyam (9) pa ka laing indibidwal may kalabutan sa giingong maanomalyang flood control projects.
