DAVAO CITY – Nahimong usa sa mga nag-unang atraksyon diri sa dakbayan sa Davao ang iladong Roxas Night Market diin halinon ang mga gibaligyang pagkaon nga haom sab alang sa mga nanarbaho matag gabii ug sa mga tig-suroy nga lokal o turista panahon sa kagabhion.
Sukad gibalik ang night market sa pag-abli niadtong Marso karung tuig human sa kapin duha ka tuig nga pagsira tungod sa COVID 19 pandemic, anaa sa kapin P2 million na ang nahimong kita sa syudad.
Tungod niana, gibutyag karon sa Davao City Economic Enterprises Officer-In-Charge Maximo Macalipes Jr. nga ilang padak-on ug palapdon pa ang nahisgutang night market.
Sumala kang Macapiles, laraw nila nga magdugang og mga food stalls nga ilang ipapwesto sa may Quezon Boulevard ning dakbayan.
Mamahimong dakong tabang ang pagahimoong expansion sa night market alang sa mas daghang mga manindahay ug panginabuhian.
via || Bombo LJ Florendo
