Andam kuno moatubang si kanhi House Speaker ug Leyte 1st District Representative Martin Romualdez sa ginahimong preliminary investigation sa Office of the Ombudsman kalabot sa giingong anomalya sa mga flood control project.
Matod ni Atty. Ade Fajardo, abogado ni Romualdez, tubagon sa kongresista ang tanang alegasyon batok kaniya apan gipasiugda nga ang iyang gipangayo lamang mao ang patas nga proseso.
Gibutyag usab ni Fajardo nga wala’y plano si Romualdez nga mobiya sa nasud ug nagpadayon gihapon kini sa pagtuman sa iyang katungdanan isip representante sa Unang Distrito sa Leyte.
Samtang, gisubli sa kampo ni Romualdez ang ilang baruganan nga walay ebidensya nga nalambigit sa mambabalaod sa giingong iregularidad sa mga flood control project.
Sumala sa abogado, wala’y papel si Romualdez sa pag-andam sa 2025 National Budget gawas sa pagpirma niini, ug wala usab kini’y kalabotan sa pagpatuman sa mga flood control project.
Matod niya, mao usab kini ang usa sa mga nadiskobrehan sa Independent Commission on Infrastructure (ICI).
Gikuwestiyon usab ni Fajardo ang kredibilidad sa 18 ka giingong “maleta boys” nga giingong kanhing mga bodyguard ni kanhi Ako Bicol Party-list Representative Zaldy Co, nga lakip sa mga posibleng testigo nga gamiton sa imbestigasyon sa Ombudsman.
Giingon niya nga dili angay tuohan ang ilang mga pahayag tungod kay ang Department of Justice mismo kuno ang mipasaka og kasong perjury batok kanila, nga matod niya nagpakita nga namakak sila ubos sa panumpa.
