Gikwestyon ni Davao City 1st District Rep. Paolo “Pulong” Duterte ang pahayag sa Malacañang nga dili sakop sa gobyerno sa Pilipinas ang polisiya sa Estados Unidos, ug iyang giusisa ang paggamit sa konsepto sa “sovereignty” sa lain-laing sitwasyon.
Gipangutana niya kung asa kuno ang “sovereignty” sa nasud kaniadtong gidala si kanhi President Rodrigo Duterte ngadto sa The Hague aron atubangon ang kaso sa International Criminal Court.
Sumala pa ni Rep. Duterte nga dili angay gamiton ang mga termino sama sa ICC, Interpol, cooperation, ug coordination aron tabunan ang iyang giingong isyu kabahin sa soberanya sa Pilipinas.
Dugang pa niini, kung tinuod ang prinsipyo sa gobyerno kabahin sa independence ug sovereignty, kinahanglan kini ipakita sa tanang panahon ug dili lamang kung pabor sa usa ka sitwasyon.
Ang maong pamahayag ni Pulong, reaksiyon sa mga isyu kabahin sa polisiya sa Estados Unidos, ICC, ug sa pag-atubang sa kaso sa iyang amahan.
