Nanawagan pag-usab si Davao del Norte First District Rep. De Carlo “Oyo” Uy sa pagrepaso ug pag-amendar sa Juvenile Justice and Welfare Act (JJWA) aron mas mapalig-on ang accountability sa mga menor de edad nga nalambigit sa seryosong mga krimen ug mapanalipdan ang publiko ug mga biktima.
Gihimo ni Rep. Uy ang maong panawagan taliwala sa nagkasunod-sunod nga mga insidente sa kapintasan sa mga eskwelahan nga naglambigit sa mga menor de edad sa nagkadaiyang bahin sa nasud.
Matud pa sa kongresista, ang maong mga hitabo nagpamatuod sa panginahanglan sa mas epektibong mga polisiya nga makatubag sa kaluwasan sa publiko ug sa kaayohan sa kabatan-onan.
Dugang pa niini, iyang gipalutaw pag-usab ang House Bill No. 5307 nga iyang gisang-at niadtong Oktubre 2025 aron mapalig-on ang implementasyon sa JJWA, madugangan ang accountability sa mga menor de edad nga nalambigit sa seryosong mga kaso ug maklaro ang responsibilidad sa mga ginikanan ug guardians.
Lakip usab sa iyang gisugyot ang mas hugot nga koordinasyon tali sa DepEd, kapulisan, lokal nga panggamhanan, mga ginikanan ug school administrators aron mapalig-on ang seguridad sa mga eskwelahan, mental health support ug mga programa sa pagpanalipod sa kabatan-onan.
Sa kasamtangan, mipahayag si Rep. Uy nga ang malungtarong solusyon nagkinahanglan sa hustisya, accountability ug panagtambayayong sa tanang sektor aron masiguro ang kaluwasan sa mga kabataan.
