Posibleng maminusan sa House prosecution panel ang gidaghanon sa mga testigong ipresentar sa impeachment trial ni Vice President Sara Duterte, kon mapamatud-an na pinaagi sa mga ebidensya ang mga alegasyon nga gilatid sa impeachment complaint. Sumala pa kang House Prosecutor ug Manila Representative Joel Chua, tumong sa maong lakang ang pagpaspas sa dagan sa pagtaral ug paglikay sa mga pagdungog nga dili na gikinahanglan.
Dugang pa niini, dili na kinahanglan ipresentar ang tanang nakalistang mga testigo kon igo na ang mga ebidensyang mapakita aron mapalig-on ang kaso sa prosekusyon. Lakip sa Article I sa impeachment complaint, nga may kalabotan sa giingong sayop nga paggamit sa confidential funds sa Office of the Vice President (OVP) ug Department of Education (DepEd), adunay andam nga 13 ka testigo ang prosekusyon. Apan, mahimo kining maminusan kon igo na ang mga ebidensya human sa testimonya sa walo hangtod siyam ka mga testigo.
Matud pa ni Chua, dili mahuyang ang kaso bisan maminusan ang gidaghanon sa mga testigo, basta magpabiling lig-on ug igo ang mga ebidensyang ipresentar sa impeachment court. Kahinumduman nga subay sa 1987 Constitution, gikinahanglan ang two-thirds nga boto sa Senado aron mahatagan og pinal nga hukom ang usa ka opisyal nga giatubang og impeachment.
Sa pagkakaron, gilauman nga motestigo sa Senado sa umaabot nga semana ang mga state auditors nga misusi sa paggamit sa P612.5 milyong confidential funds sa OVP ug DepEd alang sa 2022 ug 2023.
