Gipahayag ni Pangulong Ferdinand “Bongbong” Marcos Jr. nga nagpabiling lig-on ug padayon pang nagkalawom ang relasyon tali sa Pilipinas ug Estados Unidos ubos sa iyang administrasyon.
Sumala pa sa Pangulo, wala mausab ang kahimtang sa relasyon sa duha ka nasod sukad siya milingkod sa katungdanan. Hinuon, matud pa niya, padayon kining naglig-on pinaagi sa mas lawom nga kooperasyon ug padayon nga pagsinabtanay ug pagtinabangay sa duha ka mga kaalyado.
Dugang pa niini, gipasiugda ni Pang. Marcos nga kapin na sa usa ka siglo nga nagbarog isip lig-on nga mga kaalyado ang Pilipinas ug Estados Unidos. Matud pa niya, mas milapad pa ang ilang panag-uban, ilabina sa pag-abot sa bag-ong mga teknolohiya nga nag abli
og dugang nga mga oportunidad alang sa kooperasyon sa nagkalainlaing sektor.
Lakip sa iyang gipadayag, giingon usab sa Punong Ehekutibo nga nagpabiling aktibo ug malig-on ang panag-alyansa sa duha ka nasod, ug posible pang mas kusgan kini sa pagkakaron kumpara sa nangaging mga tuig.
Sa kasamtangan, gipasabot ni Marcos nga magpadayon ang gobyerno sa pagpalig-on sa bilateral nga relasyon tali sa Pilipinas ug Estados Unidos aron mapalambo ang ilang komon nga interes ug mapalapad pa ang kooperasyon sa nagkalainlaing natad.
