Posibleng dalaon sa Estados Unidos si Kingdom of Jesus Christ o KOJC founder Pastor Apollo Quiboloy, diin ang United States Marshals ang mahimong modawat sa iyang kustodiya kung maaprobahan ang extradition request batok kaniya.
Sumala ni Philippine Ambassador to the United States Jose Manuel “Babe” Romualdez, lagmit dad-on si Quiboloy ngadto sa hurisdiksyon diin kuno nahitabo ang mga giingong krimen, sa Los Angeles.
Matud ni Romualdez, adunay kaugalingong eroplano ang US Marshals ug sila mismo ang posibleng mosundo kang Quiboloy aron dad-on sa lugar diin pagadumalahon ang iyang kaso.
Dugang pa niini, gipaklaro sa embahador nga ang extradition request nag-agi sa pormal nga proseso tali sa duha ka gobyerno, diin gipasa sa US State Department ang hangyo ngadto sa Department of Foreign Affairs sa Pilipinas ug dayon kini gipasa sa Department of Justice.
Ang mga korte sa Pilipinas maoy magbuot kung unsaon pagpadayon sa maong extradition request, ilabina nga adunay usab pending criminal cases si Quiboloy dinhi sa nasud.
Gihulagway sa embahador ang kaso isip usa ka high-profile international matter tungod kay nalambigit kini sa mga alegasyon sa human trafficking ug sex trafficking, nga giisip nga prayoridad sa mga ahensya sa pagpatuman sa balaod sa tibuok kalibotan.
Bisan pa niini, gipasiugda ni Romualdez nga adunay obligasyon ang Pilipinas nga makigtambayayong sa internasyonal nga mga kaso, apan kinahanglan usab nga masiguro nga ang bisan kinsang Pilipino nga ipadala sa laing nasud makadawat og patas nga paglitis.
Kahinomduman nga sumala sa 2021 US indictment, ang mga giingong biktima ni Quiboloy nag-edad og 12 hangtod 25 anyos ug giingong girecruit isip iyang personal assistants alang sa pag-andam sa pagkaon, pagpanglimpyo sa iyang pinuy-anan, paghatag og masahe, ug uban pang giingong kalapasan.
Dinhi sa Pilipinas, gidakop si Quiboloy kaniadtong Setyembre 2024 human sa usa ka halapad nga pagpangita tungod sa kasong paglapas sa Republic Act No. 7610 o Special Protection of Children Against Abuse, Exploitation, and Discrimination Act.
Giatubang usab niya ang non-bailable nga kaso nga qualified human trafficking ubos sa Section 4(a) sa Republic Act No. 9208, as amended, sa Pasig court.
Sa pagkakaron, nagpabilin si Quiboloy nga nakakulong sa Pasig City Jail, bisan pa man sa iyang pag file og not guilty plea sa mga kasong giatubang batok kaniya.
