DAVAO REGION- Gibutyag ni Public Safety and Security Office kon PSSO Head, Retired Col. Angel Sumagaysay nga ayha pa man ipahigayon ang Iron Man 70.3, ilaha ng mapasiga ang tanang suga sa Davao City Coastal Road pinaagi sa pakigtambayayong niini sa lokal nga panggamhanan, Department of Public Works and Highways ug Davao Light and Power Company.
Sumala pa sa gipagawas nga datos niini nga sa kinatibuk-ang 494 ka mga street lights, 325 lamang niini ang function samtang 169 niini ang plano pa lamang nga pasigaon.
Kon kahinumduman, usa ka bulan na lamang ang paabuton ayha ang gikahinamang Iron Man 70.3 nga magsugod sa Davao City Coastal Road padulong ngadto sa Sta. Cruz, Davao del Sur subay sa selebrasyon sa Kadayawan sa Davao ning tuiga.
Dugang pa ni Sumagaysay nga aduna silay 500 ka mga personahe ang ipakatap gikan sa Civil Security Unit alang sa maong kalihukan og gani nakigpagkoordinate na kini sila sa mga security clusters sa Sta. Cruz, Davao del Sur ug sa mga Kapitan sa matag Barangay nga maagian sa maong kalihukan aron makatampo usab kini sila sa mga force multipliers nga barangay tanod.
