Giplano sa bag-ong Regional Director sa Police Regional Office XI nga si PBGen Joseph Arguelles ang paggamit og artificial intelligence (AI) aron mapaspas pa ang response time sa kapulisan sa Davao Region.
Sa iyang unang adlaw sa serbisyo, mipadayag si Arguelles nga mangita siya og mga eksperto aron tun-an kung unsaon pag-aplikar sa AI sa ilang operasyon.
Tumong niya nga mas labwan pa ang 3-minute response time nga target sa PNP, ilabi na sa syudad.
Sumala ni Arguelles, gamiton nila ang teknolohiya ug palig-onon ang presensya sa kapulisan aron mapadali ang serbisyo ug mapugngan ang krimen.
Plano sab niya nga i-modernisa ang sistema sa komunikasyon ug rekruton ang mga eksperto sa teknolohiya aron mas lig-on ang serbisyo sa PRO-XI.
Gipuli si Arguelles kang Brig. Gen. Leon Victor Rosete atol sa turnover ceremony sa Camp Quintin M. Merecido, Buhangin, Davao City.
