Gigamit kuno ang kwarta gikan sa Philippine Offshore Gaming Operators (POGO) isip reward sa mga pulis nga mipatay sa mga drug suspect sa dihang gipatuman ang war on drugs campaign sa administrasyong Duterte.
Gipahayag ni House Committee on Human Rights chairperson ug Manila Rep. Bienvenido Abante nga adunay reward system sa higayong nakapatay ug drug pusher.
Nasayran kini nila sa testimonya sa usa sa mga sakop sa kapulisan nga mukabat sa P20,000 ngadto na sa P60,000 ang ginabayad.
Dugang pa sa magbabalaod, aduna kini inpormasyon nga nagagikan ang kwartang gigamit isip reward gikan sa POGO.
Subay sa opisyal nga report sa Philippine National Police (PNP), mukabat sa 6,000 ka mga suspek ang napatay sa drug war apan sa datos sa human right group, mosobra sa 20,000 ang nahimong biktima sa extrajudicial killings sa administrasyong Duterte.
Samtang gipahayag usab ni House Committee on Dangerous Drugs chairperson ug Surigao del Norte Rep. Robert Ace Barbers nga subay sa mga testimonya ug nakuha nga ebidensya, adunay mga pagsupak sa tawhanong katungod nga nahitabo sa mga POGO hubs.
