Nagdugang ang Philippine National Police o PNP og mga personnel ug resources alang sa rescue ug disaster response operations sa mga komunidad nga naapektuhan sa pagbaha tungod sa padayong pag-ulan nga dala sa southwest monsoon o habagat.
Sumala kang PNP Chief Gen. Jose Melencio Nartatez Jr., nagpadala ang pambansang kapulisan og dugang nga personnel ug resources alang sa evacuation ug uban pang gikinahanglang disaster response operations.
Kini tungod sa padayong pag-ulan nga nasinati sa Luzon, nga miresulta sa kaylap nga pagbaha sa Metro Manila ug mga kasikbit nga lugar.
Una niini, nagpahigayon usab og preemptive evacuation ang pipila ka lokal nga panggamhanan, ilabina sa mga komunidad nga dali bahaan ug mga lugar nga duol sa mga waterways.
Samtang, nagpabiling taas ang hulga sa pagbaha ug landslide sa pipila ka bahin sa Luzon.
Sumala sa PAGASA, gipagawas ang red rainfall warning sa Ilocos Sur ug Benguet.
Nagpasabot kini nga posibleng molapas sa 200 millimeters ang ulan ug mahimong hinungdan sa grabeng pagbaha ug pagdahili sa yuta.
Gimandoan usab ang mga police unit sa mga apektadong lugar nga makigkoordinar sa mga lokal nga awtoridad aron motabang sa mga residente nga kinahanglan mubalhin o nanginahanglan og ubang tabang.
Gihangyo ni Nartatez ang publiko nga magpabiling kalmado apan alerto ug sundon ang mga pahimangno sa mga awtoridad alang sa ilang kaluwasan.
Nagpasidaan usab ang PNP batok sa pagpakaylap sa mga dili beripikadong impormasyon bahin sa kahimtang sa panahon, tungod kay mahimo kini nga hinungdan sa kahadlok ug panic sa publiko.
