Gipadayag sa Department of Migrant Workers nga daghang mga Overseas Filipino Workers (OFWs) ang nawal-an og trabaho tungod sa nagpadayon nga giyera sa tungang Sidlakan.
Subay sa press briefing kagahapong adlawa, Abril 17, gikompirma ni DMW Usec.Jainal Rasul Jr. nga adunay mga OFW nga permanenting nawagtangan og trabaho samtang ang uban temporaryo nga naapektuhan o natanggong ang ilang pagtrabaho.
Tungod niini, mipahigayon ang ahensiya og tabang alang sa mga apektadong OFW ug gipasayon ang proseso sa aplikasyon alang sa cash assistance nga nagkantidad og $200 o mokabat sa ₱12,100, nga gikan sa AKSYON Fund sa ahensiya.Aron makabenepisyo sa maong ayuda, ang mga OFW kinahanglan mosumite sa request for assistance form, kopya sa pasaporte, pruweba sa overseas employment sama sa kontrata, visa o labor card, ug ebidensya sa pagkawala sa trabaho sama sa certification gikan sa employer, payslip, notice of termination, visa cancellation kung aduna, self-declaration sa OFW, ug certification gikan sa Filipino community.
Gipunting sab sa DMW nga padayon ang ilang koordinasyon sa mga apektadong OFW aron masiguro nga dali ug hapsay nga makadawat sila og tabang ilabi na niining lisod nga panahon sa kagubot sa rehiyon.
