Ubay-ubay ka mga kaso sa COVID-19 ang na-detect karon sa Davao City Health Office gikan sa mga estudyante sa pipila ka mga medical schools ning syudad. Kini human sa duha ka semana sukad ang pagbalik sa face–to-face classes sa tanang academic levels.
Sa gipagawas nga impormasyon ni CHO Head Dr. Ashley Lopez, gibutyag niini nga subay sa ilang monitoring, anaa sa 15 ka mga Filipino medical students ang gikatahong nataptan sa COVID diin mao kini ang mga fourth year students nga gikinahanglang mupailalom sa RT-PCR tests ayha tugutan nga makatambong sa ilang klase.
Apan giklaro sa opisyal nga ang maong mga kaso ang ubos lamang sa 10 percent sa kinatibuk-ang ihap sa mga estudyante sa dakbayan. Gawas pa niini, wala sab magpakita ang mga estudayante og bisan unsa mang sintomas samtang ang pipila ang nakasinati og very mild symptoms lamang.
Gumikan asymptomatic to mild cases lamang, wala na gikinahanglan pa nga mupailalom sa hospitalization ang mga nahisgutan. Sagad kanila ang kinahanglan lamang mupailalom sa pito ka adlaw nga isolation sa ilang tagsa-tagsa ka mga panimalay.
Giklaro usab ni Lopez nga ang mga natalang kaso sukad sa pagbalik sa face-to-face classes kaniadtong August 22 ang dili angayang kabalaka-an. Matud pa sab niini nga adunay lamang gamay nga posibilidad nga i-suspende ang face-to-face nga pamaagi sa klase.
