DAVAO CITY – Karon pa lang nagpahimangno na ang City Transport and Traffic Management Office (CTTMO) nga adunay ipasara nga mga kadalanan sa dakbayan dungan sa gikatakdang pag-abli sa Pasko Fiesta ugmang adlaw. Sumala pa kang CTTMO head Dionesio Abude, pipila sa mga dalan nga gipasirad-an ang City Hall drive ug San Pedro St. Samtang ang dalan sa Rizal ug Bolton ingon man Rizal Ponciano ang igahin usab nga parking area alang sa mga bisita sa aktibidad.
Gitataw ni Abude nga paningkamutan sa ilang mga sakop nga mahapsay ang dagan sa trapiko aron nga malikayan ang paghuot sa mga sakyanan.
Samtang dungan usab sa kasaulogan sa kapaskohan, gitapok sa Task Force Davao (TFD) ang mga vendors sa Roxas Night Market, San Pedro St. ug Magsaysay Park kini aron nga ipasabot kung paunsa mabantayan ang mga tawo nga adunay dautan nga plano.
Mismong si Major Louie Legarde, Public Information Office sa Task Force Davao (TFD) mihatag ug tips sa mga vendors aron masiguro ang seguridad sa ilang palibot samtang anaa sila sa ilang pagpaninda.
Gipakita sab sa opisyal ang mga nagkadaiyang bomba nga mamahimong gamiton sa mga terorista.
