Init karon nga gihisgutan ang giingong pagkansela sa gipaabot nga kasal sa aktres nga si Bea Alonzo ug businessman nga si Vincent Co human wala kunoy pagkasinabtanay bahin sa ilang prenuptial agreement.
Sumala sa report, nagka-“stalemate” kuno ang duha kabahin sa prenup nga maoy giingong hinungdan sa pagkalanagan sa ilang wedding plans nga gilauman untang himuon sa Spain.
Aduna usab kunoy pipila ka probisyon sa prenup nga giisip sa kampo ni Co nga dili patas, samtang si Bea kuno nagpabilin sa iyang baruganan kabahin niini.
Wala gipubliko ang eksaktong detalye sa mga kondisyon base sa hangyo sa usa ka source.
Gikataho usab nga adunay mga bisita ug paryente sa duha nga naka-book na daan og biyahe padulong sa Spain alang unta sa kasal. Apan tungod sa pagbag-o sa plano, gigamit na lang kuno nila ang ilang mga tiket alang sa laing lakaw.
Matud pa, dugay na usab nga nagpuyo sa Spain si Bea sukad pa niadtong 2022 human siya nakapalit og property sa maong nasud.
Kung kahinumduman, una nang mikatag ang tsismis nga sa St. Peter the Apostle Parish sa Manila ipahigayon ang kasal, apan sa ulahi migawas ang balita nga sa Europa na kini himuon isip pribadong seremonya.
Mas misamot pa ang mga espekulasyon human makita ang pipila ka suod nga higala ug kabanay ni Bea nga mibyahe usab paingon sa Spain.
Si Vincent Co anak sa retail magnate nga si Lucio Co ug adunay taas nga posisyon sa Cosco Capital, Inc. ug Puregold Price Club, Inc..
Samtang si Bea nagpabilin gihapong aktibo sa showbiz ug sa iyang negosyo.
Sa pagkakaron, wala pa’y opisyal nga pahayag gikan sa kampo nila Bea ug Co kabahin sa giingong pagkansela sa ilang kasal.
Padayon usab nga naningkamot ang Bombo Radyo sa pagkuha og pahayag gikan sa duha apan wala pa kini tubaga hangtod karon.
