Gipalig-on nila Pangulong Ferdinand R. Marcos Jr. ug Canadian Prime Minister Mark Carney ang ilang komitment nga mahuman ang negosasyon alang sa Philippines-Canada Free Trade Agreement (FTA) sa dili pa matapos ang kasamtangang tuig.
Sumala pa sa duha ka lider atol sa ilang panagtagbo sa Vancouver, Canada, tumong nilang mapalig-on pa ang kooperasyon sa komersiyo, pagsumpo sa economic coercion, ug pagtukod og mas lig-on nga supply chain tali sa Pilipinas ug Canada.
Dugang pa niini, lakip sa mga nag-unang produktong ginapalit sa Canada gikan sa Pilipinas ang electronics ug machinery, samtang ang mineral ores, karne, cereal, aerospace parts, ug abono maoy pipila sa mga nag-unang eksport sa Canada ngadto sa Pilipinas.
Sa kasamtangan, nagpadayon usab ang negosasyon alang sa ASEAN-Canada Free Trade Agreement, nga gilauman nga makapalapad pa sa oportunidad sa negosyo ug pamuhunan tali sa Canada ug sa mga nasod nga sakop sa ASEAN.
Kahinumduman, gilauman sa duha ka lider nga ang maong kasabotan makapalig-on pa sa relasyon sa komersiyo ug ekonomiya tali sa Pilipinas ug Canada, ug magbukas og mas daghang oportunidad alang sa mga negosyante ug mamumuhunan sa duha ka nasod.
