Misaka pag-usab ang Pilipinas sa global nga entablado human makab-ot ang ranggo isip ikaduhang pinakadakong exporter sa saging sa tibuok kalibutan, usa ka timailhan sa kusog nga pagbangon sa sektor sa agrikultura sa nasud.
Base sa pinakabag-ong datos sa Food and Agriculture Organization (FAO) sa United Nations, mipuwesto ang Pilipinas sunod sa Ecuador sa eksportasyon sa saging, samtang nagpabiling numero uno nga supplier sa Asia. Sa katapusan sa 2025, misaka og 25.6 porsyento ang export volume sa saging sa nasud, nga miabot sa kapin 2.93 million metric tons.
Gipahayag ni Agriculture Secretary Francisco Tiu Laurel Jr. nga ang kalampusan bunga sa klaro ug target nga interbensyon sa gobyerno, ilabi na sa pagpalig-on sa produksyon ug merkado sa high-value crops. Usa sa mga hinungdan mao ang pagpalapad sa export portfolio sa Department of Agriculture aron mas masakop pa ang global nga panginahanglan.
Ilawom sa 2025 High Value Crops Development Program, nag-apod-apod ang DA og kapin 106,000 ka planting materials ngadto sa lokal nga mga mag-uuma. Tumong niini nga dugangan ang ani sa saging ug uban pang high-value crops aron mapalig-on ang kita sa mag-uuma ug masiguro ang padayon nga suplay para sa internasyonal nga merkado.
Sumala sa DA, ang pag-uswag sa banana exports dili lang nagpasabot og pagtaas sa kita sa nasud, kundili usab og dugang nga oportunidad sa trabaho ug lig-on nga panginabuhi sa mga komunidad nga nagsalig sa agrikultura. Gilauman nga magpadayon ang maong momentum samtang ginapalapad pa ang suporta sa teknolohiya, logistics, ug access sa merkado alang sa mga Pilipinong mag-uuma.
