Misadsad ang Philippine peso ngadto sa bag-ong record low kagahapong adlawa, halos moabot sa 62 kada US dollar tungod sa padayong tensyon sa Middle East ug kawalay kasiguruhan sa interest rate policy sa Estados Unidos.
Narekord ang intraday low nga 61.995 sa morning trading sa wala pa mosira ang peso sa 61.815, mas huyang og tres sentimos kumpara sa miaging closing.
Dugang pa, nalabwan niini ang kanhing record low nga 61.85 nga natala niadtong Hulyo 24.
Matod pa sa market analysts, kusog ang demand sa US dollar isip safe-haven currency samtang gihulat sa investors ang Federal Reserve minutes alang sa timailhan sa sunod nga interest rate direction.
Lakip usab sa pressure ang nagpadayong tensyon sa Middle East.
Sa pagkakaron, gihulat sa merkado ang sunod nga policy decision sa Bangko Sentral ng Pilipinas sa Agosto 27.
Gipaabot sa mga analyst nga ang peso mahimong molihok tali sa 61.60 ug 62 sa duol nga panahon. | VIA BOMBO EROS PAJOTA
