Nadakpan ang 33 anyos nga lalaki sa buy-bust operation sa kapulisan sa Purok 10, Barangay Aplaya, Digos City, alas-3:16 sa kaadlawon niadtong Oktubre 25, 2026, diin nasakmit ang gidudahang shabu nga nagkantidad og ₱22,848.
Giila ang dinakpan nga si John John Roble Ani, alyas “Bal,” usa ka laborer ug residente sa Purok Manga, Barangay San Miguel, Digos City. Giingong giklasipikar siya sa kapulisan isip suspected local individual nga nalambigit sa ilegal nga droga.
Gipahigayon ang hiniusang operasyon sa mga personahe sa Digos City Police Station, PDEA Davao del Sur, Provincial Drug Enforcement Unit ug intelligence personnel sa 1st Davao del Sur Provincial Mobile Force Company, ubos sa koordinasyon sa PDEA.
Narekober sa suspek ang upat ka heat-sealed plastic sachet nga adunay gidudahang shabu, nga may kinatibuk-ang gibug-aton nga 3.36 gramos. Nasakmit usab ang ₱1,000 nga buy-bust money, usa ka itom nga coin purse, asul nga Redmi Android phone ug improvised all-weather pipe.
Gimarkahan ug gi-inventory sa lugar ang mga ebidensiya, uban sa presensya sa mga giimbitar nga saksi ug sa suspek, subay sa gitakdang pamaagi sa balaod.
Atubangon sa dinakpan ang kasong paglapas sa Republic Act 9165 o Comprehensive Dangerous Drugs Act of 2002.
