Gipahayag sa House Prosecution Panel nga posibleng usa na usab kini ka lakang aron malangan ang impeachment trial ni Vice President Sara Duterte ang plano sa iyang defense team nga modangop sa Korte Suprema.
May kalabotan kini sa pahayag ni defense spokesperson Atty. Michael Poa nga andam silang modala sa Korte Suprema sa isyu kalabot sa gikinahanglang ihap sa mga boto aron makombikto ang Bise Presidente sa impeachment trial sa Senado.
Kahinumdoman nga niadtong Septiyembre 23, mibotar ang Senate Impeachment Court nga ipaubos ang voting threshold o ang gikinahanglang ihap sa mga boto sa impeachment proceedings, diin 13 ka senador ang mipabor samtang si Presiding Officer Chiz Escudero lamang ang misupak.
Sumala kang Rep. Zia Alonto Adiong, tigpamaba sa House Prosecution Panel, nakahimo na og desisyon ang Korte Suprema sa susamang isyu niadtong Septiyembre 30, diin gisalikway niini ang managlahing mga petisyon nila Atty. Victor Rodriguez, Atty. Ernesto Francisco Jr., ug Berteni Cataluña Causing tungod sa kawalay legal standing ug sa pagkapremature sa mga petisyon o sa sayong pagsang-at niini nga wala pa matuman ang gikinahanglang legal nga kondisyon.
Gipasabot ni Adiong nga bisan katungod sa defense team ang pagdangop sa Korte Suprema, posibleng magpabilin ang baroganan sa hukmanan tungod kay susama ra ang hilisgutan ug mga legal nga argumento sa mga nag-unang petisyon nga gisalikway na niini.
