Gibutyag ni Pangulong Ferdinand “Bongbong” Marcos Jr., ang padayon nga pagpasaka og mga kaso batok sa pipila ka mga opisyal sa gobyerno, mambabalaod, ug mga kontraktor nga giingong nalambigit sa iregularidad sa mga flood control projects.
Sumala pa sa Pangulo, lakip sa giila nga posibleng atubangon og kaso sa Office of the Ombudsman ang iyang ig-agaw nga si Leyte Representative Ferdinand Martin Romualdez. Matud pa ni Marcos, bisan lisod alang kaniya isip kapikas sa pamilya ang maong kahimtang, kinahanglan nga ipatuman ang balaod ug buhaton ang hustong proseso isip pangulo sa nasud.
Dugang pa niini, human sa iyang SONA, mipagawas og pahayag si Romualdez diin iyang giingong iyang gitahod ang posisyon ug desisyon sa Pangulo. Lakip sa gipahayag ni Romualdez nga wala siya mangayo og espesyal nga pagtratar ug andam siyang moatubang sa bisan unsang imbestigasyon subay sa balaod. Giingon usab niya nga nagbarug siya sa iyang posisyon nga wala siyay nalapas nga balaod ug andam siyang pamatud-an kini pinaagi sa hustong ligal nga proseso ug pinaagi sa ebidensya.
Sa kasamtangan, wala pa mopagawas og dugang detalye ang Office of the Ombudsman kabahin sa posibleng pagpasaka sa mga kaso, samtang nagpadayon ang imbestigasyon sa giingong mga anomalya sa flood control projects. Kahinumduman, sa miaging mga bulan, gibutyag sa administrasyon ang giingong mga iregularidad sa daghang flood control projects sa nagkadaiyang bahin sa nasud ug gimando ang pag-imbestiga sa mga opisyal ug pribadong indibidwal nga posibleng adunay kalambigitan niini.
