Gipahibawo sa Department of Social Welfare and Development (DSWD) nga iapud-apud na lamang pinaagi sa e-wallet transfers ang cash aid alang sa mga benepisyaryo sa fuel subsidy human nakabsan sa kinabuhi ang usa ka rider samtang naglinya sa payout center sa Quezon City.
Sumala kang DSWD Secretary Rex Gatchalian, ipatuman kini sa sunod nga payouts ug idirekta na ngadto sa e-wallet sa mga transport network vehicle service (TNVS) ug motorcycle taxi riders nga apil sa listahan sa mga awtorisadong makadawat sa maong subsidiya.
Giklaro usab ni Gatchalian nga ang listahan sa mga benepisyaryo gibase sa gisumite sa Land Transportation Franchising and Regulatory Board (LTFRB), nga naglangkob sa mga lehitimong drayber.
Personal usab nga mitambong ug nagpadangat sa pahasubo ang kalihim sa pamilya sa namatay’ng rider ug naghatag usab og tabang pinaagi sa medical ug burial assistance ug uban pang panginahanglan sa pamilya.
