DAVAO CITY- Nahimong malampuson ang pagpahigayon og simultaneous nga pay-out sa Department of Social Welfare and Development (DSWD) Field Office XI alang sa Livelihood Assistance Grant (LAG) ilalom sa Sustainable Livelihood Program (SLP) niini.
Anaa sa 2,427 ka mga kwalipikadong benepisyaryo sa nagkadaiyang munisipalidad sa Davao de Oro ang nakadawat sa maong ayuda nga gipanghatag gikan Setyembre 5 hangtud 9 ning kasamtangang tuig. Ang matag usa kanila ang nakadawat og P10,000 nga kantidad sa kapital alang sa ilang panginabuhian.
Subay niini, anaa sa kinatibuk-ang P24.2 million sab ang napagawas nga pondo sa buhatan. Gipaklaro sa ahensya nga ang Livelihood Assistance Grant (LAG) usa ka matang sa financial assistance nga ginatunol ngadto sa mga low-income families kansa mga panginabuhian naapektuhan sa pagpatuman kaniadto sa community quarantine gumikan sa nasinatiang COVID-19 pandemic.
Tumong sa Sustainable Livelihood Program nga mapalambo ang ekonomikanhong kaayohan sa mga bulnerable, marginalized, ug disadvantaged nga mga indibidwal ug pamilya sa usa ka komunidad pinaagi sa paghatag og suporta sa lokal nga panggamhanan ug uban pang mga ahensya sa gobyerno.
