Gipasalig ni Pangulong Ferdinand Marcos Jr. nga mo-endorso siya og kandidato alang sa 2028 presidential elections, apan giingon niyang sayo pa kaayo aron pangalanan kung kinsa kini.
Matud sa Pangulo, daghan pa ang mahimong mahitabo sa politika sa dili pa ang eleksyon ug wala pa usab siyay pormal nga pakigpulong sa bisan kinsang politiko bahin sa pagdagan sa pagkapangulo.
Gipasabot ni Pang. Marcos nga ginatan-aw sa Partido Federal ng Pilipinas kon PFP ang posibleng alyansa sa ubang political parties.
Matud niya, daghan na karon ang mga ngalan nga ginahisgutan samtang ginahimo usab ang mga survey aron masukod ang ilang suporta.
Samtang sa laing bahin, gitugyan na usab ni Pangulong Marcos sa Office of the Ombudsman ang imbestigasyon kabahin sa giingong flood control anomaly nga nalambigit si kanhing House Speaker ug Leyte Rep. Martin Romualdez.
Giklaro sa Pangulo nga dili siya direktang manghilabot sa detalye sa imbestigasyon ug pasagdan ang Ombudsman sa pagpatuman sa mandato niini.
Hinuon, giingon ni Pang. Marcos nga motawag siya sa Ombudsman aron mahibal-an ang kasamtangang kahimtang sa kaso alang sa iyang kaugalingong kasayuran. | VIA BOMBO EROS PAJOTA
