Gibutyag ni Pangulong Ferdinand Marcos Jr. ang padayon nga pagtutok sa gobyerno sa panglawas, pagkaon ug kaayohan sa mga Pilipino, ilabina sa mga kabataan. Sumala pa, gikanayon niini saiyang vlog kung giunsa niya pag-andam ang iyang ikalimang State of the Nation Address o SONA, diin siya mismo ang misulat sa unang ug kataposan bahin sa pakigpulong, samtang nakigtambayayong sa usa ka team sa paghimo ug pagsiksik sa ubang bahin.
Sumala pa, pipila ka semana nilang giandam ang SONA ug padayon pa niyang giayo ang iyang pakigpulong hangtod sa adlaw mismo sa iyang pag-atubang sa Kongreso. Gibutyag usab sa presidente ang mga sulat gikan sa mga kabataan nga nangayo og dugang suporta alang sa panglawas ug batok sa kagutom, bisyo ug uban pang problema.
Lakip sa mga programa sa gobyerno ang Walang Gutom Program, school feeding program, suporta alang sa mga pasyente nga nagpa-dialysis ug uban pang serbisyo panglawas. Dugang pa, gihatagan og gibug-aton ni Marcos ang zero balance billing sa mga ward sa DOH hospitals ug uban pang tabang alang sa mga pasyenteng nanginahanglan og tambal ug pagtambal.
Sumala sa presidente, importante nga himsog ug adunay igo nga pagkaon ang mga Pilipino aron makabaton og mas maayong kinabuhi ug kaugmaon.
Sa pagkakaron, padayon nga gipasiugda sa administrasyon ang mga programa alang sa panglawas, nutrisyon ug kaayohan sa mga Pilipino.
