Magsugod sa Hunyo 1, 2027 ang pagdungog sa kaso batok sa kanhing Presidente sa Venezuela nga si Nicolás Maduro ug iyang asawa nga si Cilia Flores sa federal court sa New York.
Sa wala pa ang maong pagtaral, magpahigayon una og pre-trial hearing sa Nobyembre 17, 2026 si New York Judge Alvin Hellerstein aron paminawon ang mga mosyon sa duha ka kampo.
Matud sa abogado ni Maduro nga si Atty. Barry Pollack, supakon nila ang pagpadayon sa kaso pinaagi sa pag-ingon nga ang iyang kliyente protektado sa sovereign immunity isip kanhing head of state. Kuwestiyunon usab nila ang legalidad sa operasyon sa militar sa Estados Unidos nga misikop kang Maduro ug Flores sa Caracas.
Nagpasangil ang mga piskal sa Estados Unidos kang Maduro ug Flores sa mga kasong drug trafficking, narco-terrorism ug weapons offenses, apan pareho nilang gilimod ang tanang akusasyon.
Kung mapamatud-an nga sad-an, posibleng atubangon ni Maduro ug Flores ang silot nga life imprisonment.
