Gipaningkamotan pag-usab ni Senador Sherwin Gatchalian ang pagduso sa pagdili sa paggamit sa social media alang sa mga menor de edad sa Pilipinas.
Kini human sa implementasyon sa Indonesia sa pagban sa mga batang edad 16 paubos sa paggamit sa high-risk platforms sama sa Facebook, Instagram, TikTok, YouTube ug Roblox.
Sumala sa senador, kinahanglan na nga molihok ang gobyerno aron maprotektahan ang kabataan batok sa online exploitation ug uban pang delikadong content.
Una nang gihangyo sa Cybercrime Investigation and Coordinating Center ang mga telco nga mangandam sa posibleng nationwide block sa Roblox tungod sa hulga niini sa kaluwasan sa mga bata.
Gihisgutan usab ni Gatchalian ang resulta sa Programme for International Student Assessment, nga nagpakita nga sa matag usa ka oras nga madugang sa paggamit sa digital devices sa mga 15-anyos nga estudyante, adunay tugbang kini nga pagkunhod sa ilahang performance sa Math.
Dugang pa niini, misaka ang panawagan karon alang sa regulasyon human usa ka jury sa Los Angeles mihukom batok sa pipila ka tech companies nga nalambigit sa social media addiction sa kabataan.
Sa pagkakaron, lakip na usab ang Australia sa mga nasud nga nagpatuman og pagdili sa social media alang sa mga menor de edad, nga opisyal nga gipatuman niadtong Disyembre 2025.
Kahinumduman nga una nang giduso ni CIBAC Rep. Eddie Villanueva ang sugyot nga “Social Media Protection for Minors Act” aron did-an ang mga batan-aon nga 16-anyos paubos nga ma-access ang social media platforms sa Pilipinas.
