DAVAO CITY – Padayon gihapon nga nanawagan ang Davao City Police Office sa mga katawhan dinhi sa syudad nga kinsa kadtong adunay mga impormasyon o makatudlo sa suspetsado sa paglugos ug pagpatay kang Vlanche Marie Bragas ang dunay gitanyag nga usa ka milyon nga reward money.
Ning kasamtangan, nagpagawas na og hulagway ang mga kapulisan mahitungod sa ombak nga gisakyan sa biktima. Sa taho, usa ka kolor yellow nga ombak nga (RE TRIMOTORS) nga anaay CRC sticker sa left side nga tapalodo sa ligid nga bahin ug sticker nga bungo kon kalabera nga adunay pula nga luha ug sungay nga nakapilit ilawom sa rightside headlight nga bahin ug aduna say kwentas nga bangkil nga naka bitay sa atubangan sa ombak .
Kung kahinomdoman, giklaro usab ni City Director Colonel Alberto Lupaz nga subay sa imbestigasyon sa Traffic Enforcement Unit, usa ka Reverse Engineering kon RE Badja, Rickshaw ang modelo sa bao-bao nga gigamit sa suspek sa pagpanglugos-patay kay Vlanche Bragas duha na ka semana ang milabay sa Banana Plantation sa Calinan, ning dakbayan, gani ang nahisgotang ombak maong ginapanubayan sa kapulisan.
Giawhag usab niini ang katawhan nga mokuntak sa hotline number sa kapulisan 0998-598-7074 / 295 – 0119.
