DAVAO CITY – Dili usa ipatuman sa dakbayan sa Davao ang rekomendasyon sa Inter-Agency Task Force (IATF) mahitungod sa optional nga pagsul-ob sa facemask sa outdoor areas. Kini mismo ang gikanayon ni Davao City Mayor Sebastian “Baste” Duterte bisan paman og ugaling ma-aprubahan na kini.
Dugang pa ni Duterte nga suportado niini ang rekomendasyon ni Acting City Health Officer Dr. Ashley Lopez nga ipabilin ang mandatoryo nga pagsul-ob sa face mask mapa sulod o gawas man sa panimalay hangtud sa bulan sa Disyembre.
Buot sa mayor nga obserbahan usa ang mga probinsya, mga munisipyo ug ubang syudad nga dili mag face mask kung unsay mamahimong resulta niini. Sumala pa sa mayor, kung maayo ang resulta human sa pagpatuman sa optional nga pagsul-ob og facemask sa ubang mga lugar, musunod sab ang syudad sa pagpatuman niini.
Giklaro sa mayor nga prayoridad gayud niini ang kinabuhi sa mga tawo nga maoy maapektohan sa higayon nga hingpit kining ipatuman.
