DAVAO CITY – Dili na matud pa mag-problema karon ang mga pasaherong kanunay matanggong daplin sa dalan ilabi na panahon sa kabuntagon paingon sa trabaho ingon man ang pagpauli sa tagsa-tagsa ka mga pinuy-anan ilabi na nga sagad masinatian usab ang mga pag-ulan panahon sa kagabhion.
Kini human nga gibalik sa lokal nga panggamhanan sa Davao sukad kagahapong adlawa ang operasyon sa Peak Hours Augmentation Bus Service (Phabs). Kahinumduman nga gipatuman na kini kaniadtong 2019 sa dihang nasinatian ang pandemya nga hatud sa COVID-19.
Gikanayon ni Dionesio Abude, hepe sa City Transport and Traffic Management Office, nga ila kining gihimo gumikan daghan na matud pa ang mga reklamo nga nadawat sa ilang buhatan gikan sa mga netizens nga kanunay nga matanggong sa pagpaabot og mga sakyanan.
Sa pikas bahin, ubay-ubay ka mga bus ang gi-augment alang sa Lasang, Toril, Calinan ug Catalunan Grande. Aduna say taliabot nga mga bus alang sa Cabantian ug Buhangin area. Ang maong mga rota ang kamatikdang kasagaran adunay kakulangon og mga sakyanan rason nga makulgot ang mga pasahero.
