DAVAO CITY – Gikumpirma ni Capt. Rhyan Batchar ang tigpamaba sa 10th ID Philippine Army ang nahitabong sunod-sunod nga engkuwentro niining milabay nga adlaw sa Brgy. Bulyucan sakop sa Compostela Valley.
Human sumala ang nahitabong bakbakan, usa ka alyas Dodoy nga sakop sa NPA ang mitahan sa kasundalohan diin nakuha sa posisyon niini ang armas ug mga wire nga gamit sa pagtanom ug bomba.
Nakadesisyon sumala pa si alyas Dodoy nga mosurender human nga namatikdan niini nga halos mahutdan na siya ug bala.
Gitino ni Capt Batchar nga wala natalang samdon sa tropa sa militar samtang gisubay sab nila ang pipila ka mga lugar sa ecounter sa pagtuo nga adunay nasamdan sa mga rebelde ilabi na nga migamit sumala pa ang tropa sa 60th IB ug kanyon.
Nanawagan na lamang ang opisyal nga kung adunay nasamdan sa mga NPA mas maayong motahan na lamang kini aron nga ilang madala sa balay tambalanan.
Nasayran sab sa opisyal nga sukad sumala pa nga gibawi ni Pangulong Rodrigo Duterte ang unilateral ceasefire, mikabat na sa 13 ka mga NPA ang misurender.
Padayon sab ang ilang panawagan sa mga rebelde nga mas maayong mobalik na lamang sa sabakan sa balaud gumikan kay gigamit lamang sumala pa ang mga nahisgutan sa mga communist leader.
