Nagpadayon pa karon ang gihimong imbistigasyon sa kapulisan kabahin sa nahitabong pagpusil patay sa usa ka negosyante sa nakalabay nga kaadlawon sa Sasa ning dakbayan sa Davao.
Ginalantaw karon sa mga otoridad ang kalambigitan sa iyahang negosyo kung aduna ba kini koneksyon sa krimen.
Subay sa report sa kapulisan, patay na dihang narespondehan ang usa ka negosyante human kini gipusil sa wala pa mailhing suspetsado pasado alas 2:30 sa miaging kadlawon.
Ang biktima giila nga si Leo Cernal Tingocia, 48-anyos, minyo, usa ka negosyante ug residente sa Davao Farm Village, Brgy. Lapu-lapu, Agdao, ning dakbayan sa Davao.
Sa report sa mga otoridad, nahitabo ang pagpamusil sa Muslim Village, Km11 Brgy. Sasa, ning syudad diin mao na lamang nadunggan sa mga residente ang kusog nga lanog sa buto ug nakita na lamang ang biktima nga nagbuy-od na sa dalan.
Sa pagsuta sa mga otoridad, adunay igo sa bala ang agtang nga bahin sa nahisgutan nga hinungdan sa iyahang hinanaling kamatayon.
Sa pagkakarom, gihaya na sa iyahang kabanay ang nahisgutan, samtang gibutyag sa mga otoridad nga nagdumili ang pamilya nga ipailawom ang patay ga lawas niini sa medico-legal.
