DAVAO CITY- Gi-raid sa hiniusang pwersa sa National Bureau of Investigation (NBI) ug Bureau of Internal Revenue (BIR) ang usa ka wholesale grocery store sa Tagum City, Davao del Norte kagahapon ug nakumpiska sa operasyon ang kapin 80 master cases sa iligal nga sigarilyo.
Gilayon sab nga gisirad-an sa BIR ang tindahan gumikan sa paglapas sa Republic Act 8424 o ang Tax Reform Act of 1997, partikular sa probisyon sa pagpamaligya og illegal nga sigarilyo nga dili bayad ang buhis. Base sa pagbana-bana sa mga otoridad, ang 81 master cases sa iligal nga sigarilyo ang nagkantidad og 3.3 million pesos.
Nasayran nga gipanag-iyahan sa usa ka Effie Rose Labado, ang gi-raid nga wholesale store nga adunay pangalang Ping Suka Station sa Purok Talisay, Seminary Drive, Magugpo West sa Tagum City.
Si Labado ang pasakaan na og tax evasion case gawas pa sa multang ipahamtang kaniya. Daghan matud pang mga sari-sari store ang gapalit sa Ping Suka Store gumikan whole sale price ang baligya dinhi.
Ang mga iligal nga brands sa sigarilyo nga nakumpiska sa tindahan ni Labado mao ang President, Fort, Greenhill, Billionaire, Walton, New Castle, Champion, Cannon, Oakley, Oxford, Bros ug Aris.
Gipahigayon ang raid pipila ka adlaw human nga masignit sa mga otoridad ang ginailang “pinakamalaking huli ngayong taon” nga smuggled cigarettes sa Zamboanga City niadtong Oktubre 5 diin muabot sa 5,298 master cases ang nakumpiska nga nagkantidad og P218.6 million.
Ang Tagum City ug Zamboanga City ang lakip sa listahan sa mga otoridad nga ginaisip nga “hot spot areas” sa Mindanao nga dayag ang pagpamaligya og iligal nga sigarilyo.
VIA|| Allianne Ferandos Silao
