Isip pagpangandam sa posibleng epekto sa krisis sa kalibutan ug aron masiguro ang seguridad sa pagkaon, ilabi na kay ang munisipalidad sa Banaybanay ang giila nga rice granary sa probinsya sa Davao Oriental, nagpahigayon og hiniusang pakigpulong ang lokal nga panggamhanan aron hisgutan ang kasamtangang kahimtang.
Gipanguluhan kini ni Municipal Mayor Lemuel Ian M. Larcia, kauban ang mga Sangguniang Bayan Members nga gipangulohan ni Vice Mayor Liezel S. Teves, Tanang mga Punong Barangays nga gipangulohan ni Punong Barangay Jose Amor Bagayas, mga Department Heads, MLGOO Anna Mae Valenteros, kauban ang BFP ug PNP Banaybanay.
Sa maong panagtagbo, opisyal nga gideklara ang Lungsod sa Banaybanay ubos sa State of Energy Emergency, isip lakang sa pag-andam sa posibleng mas dakong krisis nga mahimong atubangon sa umaabot nga panahon.
Ang maong desisyon gihimo aron masiguro nga andam ug organisado ang lokal nga panggamhanan sa pagpanalipod sa interes ug kaayohan sa katawhan. Naghangyo si Mayor Larcia sa bug-os nga kooperasyon sa tanang residente.
Giawhag usab niya ang matag panimalay nga magsugod og tanom og mga gulay sa ilang mga bakuran aron makatabang sa pagpakunhod sa gasto sa pagkaon.
Dugang pa, giawhag ang paglikay sa dili importante nga lakaw ug pamaliton aron mapreserbar ang panalapi sa matag pamilya.
