Mipadayag ang usa ka eksperto gikan sa National Bureau of Investigation (NBI) og pagduda sa pipila ka acknowledgement receipts nga gigamit isip ebidensya sa confidential funds sa Office of the Vice President ni Sara Duterte.
Sa pagdungog sa House justice committee, gibutyag ni forensic document examiner Carolyn Moldez-Pitoy nga sa 36 ka resibo nga ilang gisusi, adunay mga dokumento nga lain-laing ngalan apan pareho og estilo sa sulat-kamot ug pirma.
Lakip sa mga pananglitan ang mga resibo nga nakapangalan kang “Sheila Dado” ug “Sally Rendon” nga adunay halos susama nga sulat. Adunay lain usab nga grupo nga nakapangalan kang “Jason Bitangcol,” “Selsa Arojable,” “Samson Samuel,” ug “Sabel Salazar” nga adunay susamang handwriting characteristics.
Matod pa sa NBI, adunay mga petsa sa resibo nga posible nga gisulat lamang sa usa ka tawo base sa pattern sa ilahang sinulat.
Base sa orihinal nga kopya nga gihuptan sa Commission on Audit (COA), posible nga adunay mga grupo sa resibo nga gikan lamang sa usa ka nagsulat.
Ang House Justice Committee nagpadayon sa imbestigasyon kabahin sa impeachment complaints batok kang VP Sara, lakip ang alegasyon sa sayop nga paggamit sa confidential funds. Gikatakda ang sunod nga hearing sa Abril 22, 2026.
