Nag-viral samtang miani usab ug managlahing reaksyon ang insidente sa Real, Quezon human gisaninaan sa usa ka lalaki ang rebulto ni kanhing Pangulong Manuel L. Quezon sa Real Circle. Sa mga mikatag nga video ug litrato, makita ang estatwa nga gisuotan og pulang T-shirt.
Sumala sa pagpasabot sa lalaki, human nga gipatawag kini sa LGU, nakita sumala pa niini nga hugaw ang rebulto busa iyaha kining gilimpyohan ug gisuotan og bisti nga usa ka lakang nga, sumala niya nga maayo ang katuyuan.
Apan gisita kini Local Government Unit (LGU) sa Real, ug gipaklaro nga adunay balaod nga nagdili sa pagbutang og bisan unsang butang sa mga makasaysayanong monyumento.
Sumala pa ni Mayor Julie Ann Orozco Macasaet nga pwedng maglimpyo sa rebulto, pero dili kini pwedeng ilisan. Taliwala sa seryosong pahimangno sa LGU, dili mapugngan sa pipila ka netizens ang magbinuang tungod ang uban gikonekta nila ang insidente sa naunang viral nga kaso sa lalaki nga natiketan kay walay T-shirt samtang nagtrabaho sa Mandaluyong.
Adunay nagkomento nga “Basin matiketan ang rebulto mao gisaninaan?” Ang maong komento klarong padungog-dungog sa init nga diskusyon sa bag-ohay lamang nga bahin sa istriktong pagpatuman sa ordinansa kontra sa “paghukas” sa pampublikong lugar nga usa ka isyu nga na-link sa kampanya sa DILG ilalom ni Secretary Jonvic Remulla.
Bisan pa og adunay kataw-anan nga reaksyon online, klaro gihapon ang baroganan sa LGU Real: nga ang mga pampublikong monyumento dili mahimong usbon o hilabtan nga walay pagtugot, bisan pa og maayo ang tuyo sa nagbuhat niini.
