DAVAO CITY – Nagpadayon ang gihimong monitoring sa City Veterinarian’s Office (CVO) sa Repopulation Program alang sa mga baboy gikan sa pito ka mga barangay sa dakbayan sa Davao nga una nang naapektohan sa African Swine Fever (ASF) niadtong 2020.
Gikanayon ni Dr. Cerelyn Pinili, hepe sa City Veterinarian’s Office, sa 182 ka mga barangay sa syudad, apektado sa maong virus ang siyam ka mga barangay. Apan sa siyam ka mga apektado, duha lamang ka barangay ang wala gilakip sa repopulation gumikan aduna pay usa ka kaso sa ASF ang natala sa usa ka stock yard ingon man usa sab ang natala sa usa ka commercial farm.
Sa pikas bahin, muabot na sa 346 ka mga baboy ang napang-apud-apod sa lokal nga panggamhanan sa Davao alang sa Repopulation Program. Dugang pa sa opisyal, bisan paman nga dili pa mamahimong madeklara nga ASF free ang syudad, nakahimo na gihapon ang Davao City Government sa pagsubmitar og mga rekisitos ngadto sa Department of Agriculture nga maoy kinahanglang dokumento aron madeklara ang syudad isip ASF free.
