Gipahugot sa public ug private schools sa Davao Region ang ilang security measures human sa sunod-sunod nga online threats ug mga insidente sa school violence sa nasod.
Lakip sa mga lakang ang mas hugot nga bag inspection, vehicle inspection, paggamit sa metal detectors ug pagdugang sa security personnel sa mga entrada sa eskwelahan.
Dugang pa, adunay pipila ka private schools nga nagpatuman kon nagdasig sa paggamit sa transparent bags aron mas dali makita ug masusi ang sulod nga gidala sa mga estudyante sulod sa campus.
May uban usab nga tulunghaan nga temporaryong mibalhin sa online classes aron mahatagan og panahon ang pagrepaso ug pagpalig-on sa ilang security protocols.
Sa public schools, padayon ang koordinasyon sa DepEd, kapulisan, local government units ug school administrators alang sa mas hugot nga monitoring ug response sa posibleng hulga.
Lakip usab sa gipakusog ang CCTV monitoring, access control ug regular nga safety assessment.
Sa pagkakaron, gidasig ang mga estudyante, ginikanan ug school personnel nga ireport dayon ang bisan unsang suspicious activity kon online threat aron malikayan ang posibleng insidente.| VIA BOMBO EROS PAJOTA
