DAVAO CITY – Gibutyag ni PCol. Alberto Lupaz, ang City Director sa Davao City Police Office nga gihuraw ang nanag-iya sa sakyanan nga mibusikad sa Ecoland nga nakapark gawas sa usa ka condo ning dakbayan.
Subay sa CCTV footage, adunay duha ka mga indibidwal ang nakita nga mihapit sa maong sakyanan ug adunay gisuksuk nga butang diin wala pa lamang miabot ang 5 ka minuto, mibuto dayon ang maong sakyanan.
Gani, giangkon ni Atty. Magulta, ang nanag-iya niining sakyanan nga aduna siyay mga nadawat nga hulga ug ginagunitan nga mga dagkong kaso apan giklaro niini nga ang mga kliyente niini anaa sa gawas sa dakbayan.
Sa pagkakaron, padayon gihapon ang imbestigasyon sa kapulisan ug ginasubay ang duha ka mga batan-on nga maoy nakita sa CCTV.
Giklaro usab ni Lupaz nga di pa usab nila maingon og usa ba ka Improvised Explosive Device kon IED ang mibuto ug di usab timailhan sa terorismo ang maong panghitabo tungod work-related lamang kini.
Kabahin niini, mihangyo si Lupaz nga di magpataka og post sa social media aron nga malikayan nga makamugnag kabalaka sa katawhan.
