DAVAO CITY – Balhug karon sa Sasa Police station ang upat ka mga lalaki diin usa niini minor de edad human nga namaligya ug ginadili nga droga ug susama nga nasikop sa gilusad nga drug buy bust operation.
Naila ang mga suspek nga sila si Rolly Magallamento, 32 anyos, ulitawo, residente sa San Pedro Panabo City, alyas Bryan, 17 anyos, Romeo Sarmiento, 47 anyos, driver, taga Purok Bariles Brgy. San Pedro Panabo City ug alyas Jay, 20 anyos, estudyante residente sa Purok-9 A. Floirendo Panabo City.
Nasikop ang mga nahisgutan sa pinuy-anan ni Rolly diin gipahigayon ang operasyon sa otoridad.
Gitunol sumala pa sa nahisgutan ang pakete sa shabu sa nagpaka-arun ingnon nga poseur buyer bugti sa P5,000 nga marked money nga gidawat sa minor de edad nga si alyas Bryan.
Nadakpan sab ang uban pa nga mga suspek human nga nag pot session kini sa panimalay ni Rolly diin narekober sa otoridad ang cellphone, mga nagkadaiyang pakete sa shabu, ug mga drug paraphernalia.
Balhug karon sa presohan sa Sasa PNP ang mga suspek samtang gi-andam na ang pagpasaka ug kasong kalapasan sa Republic Act 9165 kun Comprehensive Dangerous Drugs Act of 2002.
