DAVAO CITY – Gi-awhag sa usa ka opisyal sa Department of the Interior and Local Government (DILG)-Davao ang empleyado sa kagamhanan nga miyembro sa investment schemes nga mas maayong mo-resign sa higayon nga padayon kini nga mosaway sa nahimong desisyon sa kagamhanan nga i-undang ang illegal nga aktibidad.
Sumala pa kang DILG-Davao director Alex Roldan, nasubo siya sa mga nabasa sa posts sa pipila ka mga government employees sa social media nga misaway sa gobyerno sa nahimong lakang niini nga ipasara ang mga money schemes human ang kamandoan ni Pangulong Rodrigo Duterte.
Gitataw sab ni Roldan nga ang mga government employees gidid-an sab nga malambigit sa sabong, pagsulod sa casino o mga illegal nga aktibidad sama sa investment schemes nga nagtanyag ug dako nga tubo.
Kahinumduman nga sayo ning bulan sa hunyo dihang gimandoan ni Pangulong Duterte ang National Bureau of Investigation (NBI), Criminal Investigation and Detection Group (CIDG), ug kapulisan nga imbestigahan ug pasirad-an ang mga investment schemes na nalambigit sa “pyramiding scheme”.
Gi-awhag sab niini ang Civil Service Commission nga molihok ug pahimangnoan ang tanan nga mga empleyado nga dili mosulod sa mga illegal nga aktibidad.
Samtang plano karon sa DILG nga momugna ug mga polisiya aron nga malikayan ang mga Ponzi-like schemes sa umaabot nga panahon.
