Gitutukan karon sa Department of Education Region 11 ang mga estudyante sa Grades 1 hangtod 3 nga nagpakita og ubos nga reading ug comprehension skills pinaagi sa pinalig-on nga programa nga Comprehension-Centered Teaching, nga gitumong aron makab-ot ang “zero non-reader” nga target alang sa school year 2025–2026.
Matod ni DepEd-11 Regional Director Allan Farnazo, ang maong programa tubag sa kakulang sa pagbasa nga nasinati sa mga bata, ilabi na kadtong apektado sa online ug modular learning atol sa COVID-19 pandemic.
Ang Grade 1 hangtod 3 maoy pinaka-naapektuhan tungod kay kini ang yugto sa pagtukod sa foundational skills sa pagbasa. Base sa datos sa milabay nga tuig 2024–2025, 11.09 porsyento sa kapin 266,155 ka learners ang natala nga low emerging readers.
Sagad sa ilang kalisdanan mao ang letter-sound recognition, word blending, ug decoding.
Nagpahimangno si Farnazo nga kung dili kini mahatagan og tukmang solusyon, posible nga makaapekto kini sa long-term learning outcomes sa mga bata.
Gipahibalo sab nga ilawom sa DepEd Memorandum No. 34, nga gipagula niadtong Abril 2025, ilunsad ang Literacy Remediation Program nga maglunsad og diagnostic assessments sa Mathematics ug Reading karong Pebrero hangtod Marso 2026 aron masayran dayon kon kinsa ang mga estudyanteng angay tutukan.
Sa laing bahin, gilauman sa DepEd-11 ang 1.45 milyon ka enrollees karong school year 2025–2026, diin 739,755 niini magpa-enrol sa elementarya ug 399,769 sa junior high school.
